Thursday 11 July 2013

ရွှေနဲ့ လည်း ယိုးမှားတယ်၊ စိန်နဲ့ လည်း ယိုးမှားဖွယ်၊ ရနံ့ သက်သက်စကား

စာအုပ်နီနီလေးက ပန်းသီးလေးကျနေတာပဲ
ကိုယ့်ကိုယ်ကို တွေးခေါ်ပစ်လိုက်တာ အာတိတ်စက်ဝိုင်းအထိ
အရည်ပျော် ရေခဲပြင်ကြီးကို စမ်းမိတယ်၊ သွေးသားတွေ ပူနွေးလာသလိုပဲ
အခိုက်ဓါတ်လေးက မထိတစ်ချက် ထိတစ်ချက်
ဘယ်စာသားတွေ စီးပြီး ဘယ်စာသားတွေဆီ ဆင်းမလဲ
ဘဝကို ' ဘွ ' လို့ အသံထွက်ကြည့်တော့ ရယ်ရသား
ကိုယ့်အမြုတေနဲ့ ကိုယ် တေတယ် ပေတယ်
သေနတ်မကိုင်ဖူးဘူး၊ ထောင်မကျဖူးဘူး
သူတောင်းစား မဖြစ်ဖူးဘူး၊ ' မ.....ဖူးဘူး ' တွေ များတယ်
ကော်ဖီသောက်တိုင်း တစ်စုံတစ်ယောက်က ကိုယ့်ကို လှမ်းပြီး ဖိတ်စင်စေတာ
မြတ်နိုးဖွဲ့  ငလျင်လှိုင်းလေး သင်
ပခုံးပေါ်မှာ အပွင့်တွေ အရစ်တွေ ဗရပျစ်နဲ့  ဟေ့ လောကဓံ ၊ ခင်ဗျားဟာ ဂျပန်ဝက်အူပဲ
ငွေလမ်းခင်းမှ ဝင်လို့ ရတဲ့ အပေါက်တွေ
အိမ်နောက်ဖေးက သရက်ကင်းလေးနဲ့ ရက်ပေါင်း တစ်ထောင်ကျော် ဝေးပြီ
ခံစားမှု ဆားရေစိမ်၊ သံယောဇဉ်ကို ဂိမ်းစွဲသလို စွဲတယ်
လူငယ်ဘဝဟာ သိပ်စိမ်းလန်းတာပဲလို့ 
တရားမဝင် အရှို့ ခံရတဲ့ တောတန်းကြီးက ဖုန်းဆက်တယ်
စာသားအဆောက်အအုံထဲ သဲ ဘယ်နှပွင့် အုတ်ဘယ်နှချပ်
အစွဲအလမ်းကို ဘိလပ်မြေ ကိုင်ပစ်လိုက်တယ် ၊ အေးရော
မအေးဘူး ၊ ပူတယ်၊ စိတ်ပူတယ်
ကိုယ်ပူသေးလား ၊ ကျန်းမာရေး ဂရုစိုက်ပါ
ဘဝထဲပင်လယ်၊ ဘဝထဲဆိုမာလီ၊ ဘဝထဲအမေဇုံ
သိပ်ကို တိုလီမုတ်စလွန်းတယ်၊ အရှုပ်ကြီးထဲမှာ၊ အခက်ကြီးထဲမှာ
မှုတ်ဝဲ စုပ်ဝဲများစွာ၊ မရိတ်သိမ်းရသေးတဲ့ ရိက္ခာ ပူပူနွေးနွေးလေး
အိပ်မက်ထဲမှာ လ ခဏခဏ ကြတ်တယ်
လူဟာ ကျောက်ခတ်ပန်းဆွဲလို မျက်ရည်စက်လက်နဲ့ ဂူ
အိပ်မက်ထဲမှာ နေ ကြတ် ပြန်ပြီ
မြင်ရတဲ့ ထုထည်ရော မမြင်ရတဲ့ ထုထည်ရော အနတ္တ နဲ့  စားကြည့်
အရသာ ဘယ်လိုလဲ၊ ဖန်တန်တန်ကြီးလား၊ ဖန်လုံအိမ် အရသာလား
အိပ်မက်ထဲမှာ လ ရော နေ ရော တပြိုင်နက်တည်း ကြတ်ပြန်ပြီ
ကိုယ်က ဒုတိယမြောက် ပြင်ဦးလွင်မြို့ကလေးပါ အချစ်ရယ်
ကျေးဇူးပြုပြီး ကြက်ဆူပင် မစိုက်ခိုင်းပါနဲ့ 
နိုင်ငံရေးတွေက Notifications တွေ တအားလေးတာပဲ
' TIME ' ပြန်ပြီ၊ တစ်ပူပေါ် တစ်ပူ ပွင့်
အရှေ့  ( ၇) ပူ၊ အနောက် (၇) ပူ၊ မိဘပြည်သူ အပူသည်များ
တရားမျှတခြင်းကို ဆီးဂိမ်းထဲ ထည့်ကစားပါ
ယဉ်ကျေးမှု အနုပညာ၊ နွေဦးပေါက်ကို မစောင့်နိုင်တဲ့ လိပ်ပြာ
ဦးပိန်တံတားပေါ် စာသားတွေထဲကနေ လမ်းလျှောက်ထွက်ခဲ့တယ်
စာသားတွေထဲကနေ ကျုံးတစ်ပတ် စက်ဘီးစီးထွက်ခဲ့တယ်
စာသားတွေထဲကပဲ ' ကျွန်တော် ' ဆိုတဲ့ စာလုံးလေးကို စက်ဘီးတင်နင်းလိုက်တယ်
ရောက်တတ်ရာရာ စိတ်အထည်ကြီးသက်သက် ရွေ့ လျား
အထက်ပါ စာသားတွေကို စီးပြီး အောက်ပါ စာသားမှာ ဆင်းတော့မယ်
စာအုပ်နီနီလေးက ပန်းသီးလေး ကျနေတာပဲ
ရင်ဘတ်ပေါ် ကောက်တင်လိုက်တယ်

-----------------------


လင်းလက်တာရာ

1.7.2013

No comments:

Post a Comment